Սվետա Ղահրամանյան

Ես սոցիալական աշխատող եմ, որի մասնագիտական հետաքրքրությունների առանցքում մարդն է՝ իր արժանապատվությամբ, իրավունքներով և բարեկեցությամբ։ Իմ գործունեությունն ուղղված է սոցիալական արդարության խթանմանը, խոցելի խմբերի աջակցությանը և հասարակության մեջ դրական փոփոխությունների ձևավորմանը։
Ներկայումս սովորում եմ Խաչատուր Աբովյանի անվան հայկական պետական մանկավարժական համալսարանի Սոցիալական աշխատանքի մագիստրատուրայում՝ շարունակաբար զարգացնելով իմ մասնագիտական գիտելիքներն ու հմտությունները։ Բակալավրիական կրթությունս ստացել եմ նույն համալսարանում՝ ավարտական աշխատանքս նվիրելով «Սոցիալական աշխատանքի դերը ընտանեկան բռնություն վերապրածների աջակցելու գործում» թեմային, որն արտացոլում է իմ մասնագիտական հետաքրքրությունների հիմնական ուղղություններից մեկը։
Ուսման ընթացքում և դրանից դուրս մասնակցել եմ մի շարք մասնագիտական պրակտիկաների և կամավորական ծրագրերի՝ աշխատելով երեխաների, սոցիալապես անապահով ընտանիքների, ընտանեկան բռնություն վերապրած անձանց և իրավախախտների հետ։ Այս փորձը հնարավորություն է տվել խորությամբ հասկանալու տարբեր խոցելի խմբերի կարիքները։ Ծավալել եմ տարբեր կամավորական գործունեություններ՝ ներգրավվելով սոցիալական աջակցության, իրազեկման և համայնքային նախաձեռնությունների իրականացման աշխատանքներում։ 
Իմ մասնագիտական հետաքրքրությունների հիմնական ուղղություններն են ընտանեկան բռնության կանխարգելումն ու զոհերի աջակցությունը, իրավախախտ անձանց վերասոցիալականացումը, սոցիալապես անապահով ընտանիքների հետ աշխատանքը և ծանր կյանքի իրավիճակում հայտնված երեխաների սոցիալական պաշտպանությունը։
Հավատում եմ, որ սոցիալական աշխատանքը միայն մասնագիտություն չէ, այլ պատասխանատվություն՝ աջակցելու մարդկանց հաղթահարելու դժվարությունները, վերականգնելու իրենց ներուժը և ապրելու արժանապատիվ կյանքով։ Իմ նպատակն է շարունակաբար զարգանալ որպես մասնագետ և նպաստել ավելի ներառական, անվտանգ և արդար հասարակության ձևավորմանը։